د  Community World Service Asia (CWSA) مؤسسه یوه بشري، پراختیايي او د حق غوښتنې اداره ده چې په اسیا، ارام سمندر سیمې او افریقا کې فعالیت کوي او د افغانستان په څو ولایتونو کې هم پروګرامونه پلي کوي.
په غرنیو سیمو کې د ډبرو د ښویېدو د زیاتېدونکي خطر د کمولو لپاره، دې مؤسسې د کابل، لغمان، ننګرهار او کونړ ولایتونو په ۱۰ ولسوالیو او ۲۰ کلیو او ټولنو کې د غرونو د لمنو د پاکولو او د ناثابته ډبرو د لرې کولو چارې ترسره کړې.
د دغو فعالیتونو په ترڅ کې، له ۱۰ زره متر مکعبو څخه زیاتې ناثابتې ډبرې لرې شوې، څو د ډبرو د ښویېدو خطر کم او د شاوخوا ۲،۴۳۰ کورنیو، یعنې نږدې ۱۴،۵۸۰ کسانو خوندیتوب ښه شي.
همدارنګه، دغو فعالیتونو شاوخوا ۲،۵۰۰ ماهرو او ۲،۰۰۰ غیرماهره کارګرانو ته د مزد په بدل کې د کار لنډمهاله فرصتونه برابر کړل. دې فرصتونو له یوې خوا کارګرو ته لنډمهالی عاید برابر کړ او له بلې خوا یې له ځايي خلکو سره مرسته وکړه، څو هغه خطرونه کم کړي چې د دوی کورونه او د ژوند چاپېریال ګواښي.